தத்தை திரும்பி வந்து விட்டதாம் 

முப்பாட்டன் காலத்தில் 

பாட்டன் காலத்தில் 

அப்பன் காலத்தில் 

வெவ்வேறு தத்தைகள் இருந்திருந்தன

இதே கூண்டில் 

அக்கா சோறு வை 

என்று கிரீச்சிட்டுக் கொண்டு 

கூண்டை சுத்தம் செய்ய திறந்ததில் பறந்து 

நான்கு நாளில் திரும்பியிருக்கிறது 

வேடிக்கை பார்க்க வந்தவர்கள் 

திரும்பிப் போனார்கள் 

சமத்தாக கூண்டில் அமர்ந்த அது 

சமத்தாக சாப்பிடவும் செய்தது 

அக்கா சோறு வை மட்டும் 

சொல்வதில்லை.