அட்டப்பாடிக்கு அருகே

சிறிய குன்றின் மீது

அந்தி இறங்கியதும்

பெட்ரோமாக்ஸ் தெரிந்த

இடுக்குகளில் இறங்கினோம்

 

புளித்தாலும் பொழுதின் நரம்பில்

பித்து நுழைத்த கள்ளு

 

இம்முறை குன்றின் மீதிருந்து தெரிந்த விண்மீன்கள் ஒரு அதிர்ச்சி சம்பவம்

 

அவைகள் முற்றுகையிட்டதில்

நான் விரும்பியிருந்த பெண்ணை நினைத்துக் கொண்டதுடன்

அதை அவளிடம் சொல்லவும் செய்தேன்

 

இப்போதெல்லாம் பேசும்போது

என்னை நினைத்துக் கொள்கிறாயா என்பதற்கு பதில்

அட்டப்பாடிக்கு போவதில்லையா என்றுதான்

வினவுகிறாள்.