தானே தன்னைக் கொத்திப் போட்டு
குவித்தாலும் சரியும்
நிற்காத நெடுஞ்சுவரில்
எழுதாத வரிகளிலெல்லாம்
அவர்கள்

காணும் பச்சையில் பச்சையில்லாமல்
தீண்டும் ஒலியில் தொடுவிரலில்லாமல்
சன்னலை வெறிக்கும் பேதலிப்பில்
அவர்கள்

அலையாய் எழுந்து விழுந்து
அழிந்து போகிற கரையோரத்தில்
கவனித்தால் அறிவீர்கள்,
கடலுக்கு இருக்கிறது ஒரு
ஒற்றைப் பெருமூச்சு.

அவர்கள்.

கோழிக் கழுத்தை அறுத்தது பார்த்ததும்
மாமிசம் விட்டேன் என்றெல்லாம் சொல்லவே
வேண்டும்
நெருப்பில் அது பொரியும் போது
நீதி தேவன் மயங்குகிறான்
கொஞ்சம் ஷுகர்
கொஞ்சம் பிரஷர்
தேவைப்படுகிறது கொஞ்சமெல்லாம்
சொகுசு
நீதி தேவனுக்கு சொறிச்சலெடுத்தால்
கோழியுடன் செல்பி
மற்றபடி சிக்கன்
பிராண்டிக்கு சைட் டிஷ்.
கோழி என்று நான் கோழியை
சொல்லவில்லை
நீதி தேவன் என்று
நீதி தேவனை சொல்லவில்லை.