கலவியில்
கண்ணுக்குள் கண் என்பது
எதிரொளிப்பில் திடுக்கிட்டு குளிர யத்தனிப்பது
மறு புனித விக்ரகம்
துணியைத் தூக்கிக் கொண்டு
மதிற்சுவர் தாண்டுவதைப்
பார்ப்பது
மணல் தெரியும் பளுங்கு நீரில்
இறங்கிய ஆழம், ஆழத்தின் ஆழத்தில் கூட
நனைந்து விடாத போதாமையை
திகைத்திருப்பது
எச்சில் துப்புவது போல
காமம் முடிந்திராது என்றால்
குத்திக் கொண்டு குருதி இறங்க
உலர்ந்து முடிய வேண்டும்,

நுழைந்து இழைந்து அமிழ்ந்து
ஒழுகியோ உறிஞ்சியோ
மலங்க விழித்த பின்னரே
நாம் தப்பிக்கிற அந்த
ஒற்றையடிப்பாதை,

கசப்பு.

அழுகின பழங்களில் கொதித்து
தன்னை எடுத்துக் கொண்டு
துளிகளாக வரிசை நின்று
இறங்கும் சாராயம்
இந்த ராப்பிச்சையின்,
அதன்
பசித்த வீறிடலின்
தொண்டையுள்
முள்.
அலையேகி வலைவீசி
தன்னைத்தான் கைப்பற்றி
மாமிசமாயுண்ணும் தரித்திரம்
வெறிக்கிறது ஜித்துமா
நமது கருக்களில் உருக் கொள்ளப் போகிற
சிசுவையும் கூட
கொஞ்சம் கண்களை அணைத்து வை
என்றோ
கொஞ்சம் லட்டுகளை மறைத்து வை
என்றோ
இசையாத பேர்பாதி சமத்துவத்தில்
எனது கண்ணே
உறக்கம் பூராவிலும்
உனது இதழ்களில் கால் நீட்டிப் படுத்து
முலைகளின் இடுக்குகளில் உள்ள இரவைப்
போர்த்திக் கொள்கிறேன்.

பக்கத்தில் எப்போதும்
எழுந்து போகாத பாம்பு படுத்திருக்கிறது.