கலவியில்
கண்ணுக்குள் கண் என்பது
எதிரொளிப்பில் திடுக்கிட்டு குளிர யத்தனிப்பது
மறு புனித விக்ரகம்
துணியைத் தூக்கிக் கொண்டு
மதிற்சுவர் தாண்டுவதைப்
பார்ப்பது
மணல் தெரியும் பளுங்கு நீரில்
இறங்கிய ஆழம், ஆழத்தின் ஆழத்தில் கூட
நனைந்து விடாத போதாமையை
திகைத்திருப்பது
எச்சில் துப்புவது போல
காமம் முடிந்திராது என்றால்
குத்திக் கொண்டு குருதி இறங்க
உலர்ந்து முடிய வேண்டும்,

நுழைந்து இழைந்து அமிழ்ந்து
ஒழுகியோ உறிஞ்சியோ
மலங்க விழித்த பின்னரே
நாம் தப்பிக்கிற அந்த
ஒற்றையடிப்பாதை,

கசப்பு.